Mae’r Gymraeg a’n diwylliant yn rhan o fywyd nifer o bobl a’n cymunedau ni ledled Cymru. Mae Llywodraeth Cymru wedi ymrwymo i gefnogi’r Gymraeg a’n cymunedau Cymraeg ni.

Rydym yn gwybod fod ail gartrefi a thai gwyliau yn gallu effeithio ar sefyllfa’r Gymraeg ac ar allu pobl leol i fyw yn lleol. Er mwyn mynd i’r afael â hyn, mae Llywodraeth Cymru wedi cyflwyno nifer o ymyraethau, ac un ohonyn nhw yw creu Rhwydwaith o Llysgenhadon Diwylliannol.

Pan fydd pobl yn symud i gymunedau newydd i fyw, neu’n ymweld ar eu gwyliau, fel Llysgennad gelli di sgwrsio gyda nhw am hanes yr ardal, am ein diwylliant a’n treftadaeth leol, ac am bwysigrwydd y Gymraeg. Gelli di hyd yn oed ddysgu gair neu ddau iddynt… Diolch, croeso, bore da / prynhawn da.

Byddi di’n dysgu llawer iawn mwy na hyn ar y cwrs, ac yna bydd modd defnyddio’r wybodaeth yn dy fywyd neu yn dy waith o ddydd i ddydd.

Beth mae hynny yn ei olygu? Wel, efallai bydd modd cael sgwrs gyda chymdogion newydd am hanes yr ardal, neu ddefnyddio ychydig o Gymraeg fel ‘Bore da!’ wrth basio ymwelwyr ar y stryd. Neu beth am gynnal sesiwn ‘paned a sgwrs’ i bobl sy’n newydd i’r ardal, neu ddysgwyr Cymraeg lleol? Wedi i ti orffen y cwrs mae nifer fawr o wahanol bethau mae modd eu gwneud. Ti biau’r dewis!