Efallai eich bod wedi gweld y cyfle i ddod yn Dywysydd Twristiaeth ar gyfer Llandudno yn cael ei hyrwyddo’n lleol yn ddiweddar. Mae’r cwrs wedi dechrau’n ddiweddar, dan arweiniad hyfforddwyr cymwys Wales Best Guides Enterprises Ltd, sef adain hyfforddiant a busnes Cymdeithas Tywyswyr Twristiaeth Swyddogol Cymru (WOTGA). Mae WOTGA yn sefydliad o dywyswyr twristiaeth proffesiynol yng Nghymru. Mae’r elfen ‘Swyddogol’ yn deillio o lythyr o gefnogaeth gan Lywodraeth Cymru, sy’n unigryw ymysg cymdeithasau tywyswyr twristiaeth yng ngwledydd y DU.  

Mae cyrsiau hyfforddiant wedi’u strwythuro ar ffurf Lefelau gyda thystysgrif a bathodynnau ar ôl eu cwblhau, gan gyfateb â rhwydwaith fyd-eang o gydnabyddiaeth ym maes tywysu twristiaid.

• Mae Lefel 1 yn Fathodyn Gwyn ar gyfer safle unigol, megis castell neu amgueddfa
• Mae Lefel 2 hefyd yn Fathodyn Gwyn ar gyfer taith gerdded mewn tref neu barc
• Mae Lefel 3 yn Fathodyn Gwyrdd ar gyfer rhanbarth sy’n cynnwys tywys ar gerbyd symudol (bws neu gar fel arfer)
• Mae Lefel 4 yn Fathodyn Glas arbennig sy’n cwmpasu Cymru gyfan a phob math o dywysu gan gynnwys anturiaethau hirach, megis teithiau cerdded ar lawr gwlad a safleoedd arbennig

Mae tywysydd gyda bathodyn swyddogol yng Nghymru’n rhoi hyder bod y gwaith tywysu o’r ansawdd a’r safon uchaf. Mae hyn yn cynnwys agweddau fel cynnwys diddorol, llawn gwybodaeth, trefniadau diogel a chyraeddadwy, a chreu profiad cofiadwy i’r ymwelydd, boed hynny’n berson lleol sy’n cymryd rhan mewn digwyddiad cymunedol neu’n ymwelydd o dramor. Mae dros 100 o dywyswyr swyddogol wedi’u lleoli ym mhob cwr o Gymru.

Un o’r meini prawf ar gyfer mynychu’r cwrs yn Llandudno oedd cyflawni’r cwrs Llysgennad safon Aur ar gyfer Conwy. Mae’r gair “Llysgennad” yn golygu rhywun sy’n hybu neu’n cynrychioli corff neu weithgaredd penodol. Mae cwblhau cwrs Llysgennad yn darparu sylfaen gwybodaeth i’r rhai hynny sy’n falch o’u cymunedau ac yn chwilio am gyfleodd i rannu’r wybodaeth hon gydag ymwelwyr a’u cymunedau.

Ers tipyn bellach, mae cynrychiolwyr Wales Best Guides Enterprises wedi bod yn cymryd rhan mewn rhwydweithio gyda Llysgenhadon, gan ystyried tywys twristiaid fel cam nesaf naturiol ar gyfer Llysgenhadon. Mae Cyngor Bwrdeistref Sirol Conwy, sy’n noddi cynllun Llysgenhadon Conwy, wedi arwain y ffordd gyda chwrs yng Nghonwy, sef Bathodyn Gwyn ar gyfer Tref Furiog Conwy, yn 2025. Mae cyfranogwyr llwyddiannus wedi derbyn eu bathodynnau ac wedi dechrau tywys teithiau ar sail fasnachol, gan ennill incwm ac ychwanegu at yr economi leol drwy ddangos nodweddion y dref. Mae rhai o’r grŵp wedi dechrau gwirfoddoli gyda Cadw gan ddehongli Castell Conwy ac ateb cwestiynau aelodau’r cyhoedd sy’n talu i ymweld.

Wedi’i ariannu gan Gronfa Ffyniant Gyffredin Ffyniant Bro Llywodraeth y DU, gyda chyfraniad gan gyfranogwyr, mae cwrs Bathodyn Gwyn Llandudno wedi denu’r rhai sydd eisoes yn ymwneud â thwristiaeth a threftadaeth yn y dref, yn ogystal â newydd ddyfodiaid.

Mae Adrian Hughes o arddangosfa Home Front Museum eisoes yn tywys teithiau o amgylch Llandudno yn aml, ond mae’n cydnabod buddion gweithio gydag eraill i gyrraedd safon, er mwyn gwella’r hyn y mae eisoes yn ei wneud ac i sicrhau bod ei gynnwys sy’n trafod straeon rhyfel ei dref hyd yn oed yn fwy pwerus.

Mae Rodney Davies yn creu cynnig o rwydwaith o deithiau yn Llandudno, wedi’i ysbrydoli gan ei brofiadau ar y cwrs Bathodyn Gwyn yng Nghonwy, lle mae tywyswyr bellach yn cydweithio i greu amserlen o deithiau rheolaidd. Ynghyd â’i gyd-gyfranogwr, Jo, bydd teithiau rheolaidd ar themâu penodol ar gael ar gyfer 2026.

Meddai Rodney;

“Roedd y cyrsiau Llysgennad yn wych, roedden nhw’n agoriad llygad i’r rhan arbennig o Ogledd Cymru lle’r ydym ni’n byw, ei diwylliant, ei hanes, ei daearyddiaeth a’i hanesion a llawer mwy. Mae’r cwrs bathodyn gwyn wedi newid fy mywyd ac rydw i’n gyffrous iawn ynglŷn â datblygu dyfodol ym maes twristiaeth yng Ngogledd Cymru. Mae ein menter newydd, Teithiau Tywys Llandudno, nawr yn cynnwys nifer o deithiau tywys, gyda llawer mwy i ddod yn 2026! Mae hyn oll yn helpu i hybu’r rhan arbennig hon o Ogledd Cymru, a rhoi rhywbeth yn ôl i eraill, gan arddangos y lle hyfryd hwn sy’n gartref i ni. Diolch i’r holl noddwyr!” 

Mae’r cwrs yn dechrau yn Amgueddfa Llandudno – diolch yn fawr i Manju a’r tîm yn yr amgueddfa wych hon ar Stryd Gloddaeth am ddarparu lleoliad ar gyfer ymarfer. Gan ddefnyddio’r Amgueddfa fel sylfaen, bydd y tywyswyr allan ar droed dros y misoedd nesaf ar ddydd Mawrth yn dysgu llwybr tywys cyn sefyll arholiad ymarferol ar eu sgiliau tywys a’u gwybodaeth.  

Ar hyd y daith, mae nifer o nodweddion tref Llandudno hefyd yn cefnogi’r achos, gan gynnwys Mostyn Estates, Penderyn Whisky, The Great Orme Copper mines a’r Pier.

Unwaith y bydd y tywyswyr dan hyfforddiant wedi derbyn eu bathodynnau, cadwch olwg am gyfres o deithiau. Dywedwch wrth eich ffrindiau! Dywedwch wrth eich gwesteion a dewch i ymuno â ni!